孙洁瑾

　　这是一个平常、平静额下半天上班辰光，所有人井然有序勒了工作，突然某同事惊叫：我手机么了。开始大家不以为意，认为伊忘记特放了萨地方了。等伊拨自家电话发觉已经关机，再肯定刚刚公司里进过贼骨头了。大家纷纷回忆，聚焦到半个钟头之前，有一个非快递模样额中年女子，从外头径直走进来。看到伊额人，才觉着伊嘎理直气壮，肯定是来寻某位同事额，也就么多过问，当时阿拉迭位同事不勒了位子浪，手机就摆了台子浪，很有可能是拨各个陌生人顺手牵羊。
　　事不宜迟，男同事马上陪牢被偷者去物业调看监控录像，居然勒了同楼额另一楼层里发觉此女额身影，等大家冲过去堵牢伊，伊正笃定额勒了钦另外一家公司门铃。以为各记抓牢了，结果家伙马上掏出残疾证一张、白纸头一张，表示自家是哑子到各个公司推销产品额。虽然之前么人看到伊有过向人推销行为，更加么人相信伊真额就是残疾人，但是任凭一群人围牢人，神情激动指认伊刚刚进过阿拉公司，是重大嫌疑，人家就是面不改色，死不开口，好像还一记头吃伊不死，么办法了。直到警察到场，让伊自家掏出袋袋里厢物事来看，伊笃笃定定拿出一部帮被窃手机一模一样额手机，指手划脚讲是自家额。但是电池板后有同事作额纪印，虽然伊已经换了SIM卡，删除了所有手机存储消息。
　　直到最终人赃并获，伊依旧保持两手捧头，摇头晃脑委屈状，于是周围捉小偷额人，不得不感叹，老早讲做贼心虚，现在小偷额心理素质，哪能就嘎好呢！侬看，短短辰光，小偷已经熟练运用了：知己知彼、瞒天过海、最危险地方就是最安全额、再接再厉、打死我也不说等伎俩，结合熟练掌握额对品牌数码产品运用技术（阿拉迭位同事手机还是刚刚买来额最新产品），可真是表看小偷小摸虽小，一样构思缜密，偷、藏、赖近乎滴水不漏。侬讲有迭底聪明才智，好好叫寻份工作做做，自食其力不是蛮好嘛，偏偏要做贼骨头，即便一两趟么捉牢，钞票来得便当，但总有马失前蹄辰光，拨人捉牢，一辈子背牢贼骨头名号，哪怕表面强作镇定，内心难道一点点都不受到责备吗？当别人用异样目光看侬，指指点点叫侬小偷，侬心里不受煎熬吗？哪怕伊拉额心理素质再高，大概勒了人脏并获事实面前，总也要败下阵来。所以，勿以恶小而为之啊！而勒了迭个还么完全达到真善美额社会里，自我防范意识也不能松懈，所谓防人之心不可无。